Selik

Selik (ümumi dildə bəlğəm və ya burun seliyi) — burun boşluqlarında və bronxlarda istehsal olunan yapışqan maye.

Seliyin tərkibində epitel hüceyrələri, mikroblar, tozlar və su mövcuddur. Suyun miqdarının az və ya çox olmasından asılı olaraq selik axıcı və ya uzanan bir struktur nümayiş etdirir. Quruduqda isə az-çox qalın və yapışqan bir qabıq halını alır. Burun boşluğunun daxili səthinin nəm qalmasını, buruna daxil ola biləcək yad maddələrin, xüsusilə tozların və gül tozlarının (tozcuqların) tutulmasını təmin edir. Selik bədəndə davamlı olaraq istehsal edilir və onun böyük bir hissəsi hiss olunmadan udulur.

Bakterial və ya viral infeksiya zamanı selik sarıdan yaşıla doğru dəyişən bir rəng alır. Viral infeksiyalar zamanı ilk iki və ya üç gün ərzində duru və şəffaf selik ifraz olunur. Üç gündən sonra isə rəngi yaşıla çalmağa başlayır. Bu mərhələdə dərhal antibiotik müalicəsinə başlamaq lazımsızdır; sadəcə xəstəliyin simptomlarını yüngülləşdirici tədbirlər görülə bilər. Seliyin ağız boşluğundan gələn növü bəlğəm adlanır. Bəlğəm — seliyin boğaz nahiyəsində yığılmasından yaranan və ya birbaşa ağciyərlərdən gələn selik növüdür.