Magra
ZE |
Sta pagina a l'é scrita in zeneise, segondo a grafia unitäia |
| Magra | |
|---|---|
 A foxe da Magra | |
| Localizzaçion | |
| Stato |  Itàlia
|
| Regioin |  Toscann-a Liguria
|
| Provinse |  Massa-Carræa A Spèza
|
| Caratteristiche fixiche | |
| Vivagna | Tra o Monte Borgognon e o Monte Tavola • 1200 m s.l.m. |
| Foxe | Mâ Ligure • 44°02′51.71″N 9°59′17.15″E |
| Longhixe | 70 km |
| Portâ | A-a foxe • med: 57 m³/s |
| Caratteristiche do baçî | |
.png) | |
A Magra (in Italian o nomme o l'é mascolin[1]) o l'é un sciumme ch'o passa pe-a Toscaña e pe-a Liguria, ch'o bagna e provinse da Spezza e de Massa-Carræa. A l'é o primmo sciumme pe portâ media a-a foxe de tutta a Liguria (57 m³/s pöcassæ, dòppo l'union co-a Væa), ma solo a parte finale do seu corso a l'é in Liguria; in sciô seu corso se forma a ciù gròssa ciaña da Liguria (a segonda a l'é quella d'Arbenga).
|
«Di quella valle fu' io litorano |
| (Dante di Ardighê, Comedia, Par. IX, 88-90) |
Corso do sciumme
[modìfica | modìfica wikitèsto]O sciumme o nasce in Toscaña à 1200 m in sciô livello do mâ, tra o Monte Borgognon (1401 m) e o Monte Tavola (1504 m), into territöio do commun de Pontremoli (provinsa de Massa-Carræa), e o forma co-o seu corso a vallâ da Magra. Arrivou into territöio ligure o s'unisce co-o Væa e dapeu o va à finî into Mâ Ligure con unna larga foxe tra Bocca de Magra e Fiummaeta, fraçioin do commun d'Ameggia.
Into træto ch'o va da Pontremoli à Aulla o mantëgne unna direçion longitudinale respetto a-a cadeña di Appennin, da nòrd-ovest à sud-est, e dapeu o cangia direçion à Aulla pe anâ verso sud-òvest e intrâ inta larga ciaña alluvionale vexin à San Steva.
A seu longhixe inte tutto a l'é de 70 km[2].
Tra i commun attraversæ da-o corso d'ægua gh'é: Aulla, Filattiera, Licciana Nardi, Mulazzo, Podenzana, Pontremoli, Tresana, Villafranca in Lunigiaña e Zeri inta Provinsa de Massa-Carræa; Ameggia, Arcoa, San Steva, Sarzaña e Vessan inta Provinsa de Spezza.
Affluenti
[modìfica | modìfica wikitèsto]In sciô seu corso se ghe caccia tanti affluenti, che nascian da-i monti de l'Appennin toscan-emilian, da quelli toscan-liguri e da-e Arpe Apuañe, tanto da-e vallæ da Lunigiaña comme da quelle da Væa. O primmo de sti affluenti, o riâ Magriola, o se caccia inta Magra un pö primma de Pontremoli.
O træto de monte do sciumme, donde o l'à a natua de un riâ, o finisce vexin a-a localitæ de Pontremoli e da chì o comensa a parte de mezo, ch'a termina in sciô ponto donde o s'unisce co-o Vara. Inte sto træto o reçeive a ciù parte di affluenti, tanto in sciâ drita comme in sciâ manciña, tra i quæ o ciù importante pe portâ o l'é o Bagnon.
I affluenti in sciâ drita, feua che a Væa, an unna portâ picciña apreuvo a-a scarscitæ de vivagne che no van mai in secca, e in generale an di corsci curti e vexin tra de lô; incangio, i affluenti in sciâ manciña en quelli che pòrtan ciù ægua a-o sciumme, perché an de boñe vivagne ascì in ertixe. I riæ ciù longhi en o Taveron e l'Aulella, che dan forma a-e doe vallæ, verso Licciana Nardi e o passo do Lagastrello, e verso Fivizzan e o passo do Cerreto; ma quello con ciù ægua o l'é o Bagnon, ch'o pòrta o mæximo nomme do commun.
Regimme idraulico
[modìfica | modìfica wikitèsto]
Dòppo avei reçevuo l'ægua da-i affluenti stæti mensunæ de d'ato, a portâ media à l'anno a cresce. Dòppo l'union co-a Væa e vexin a-a foxe a l'arriva fin à 57 m³/s pöcassæ; primma de l'union co-a Væa (o seu ciù grande affluente) a portâ a l'é de 41 m³/s pöcassæ, con unna media mascima into meise de novembre de squæxi 90 m³/s e unna minima d'agosto de 7 m³/s pöcassæ. I valoî ciù erti se tòccan d'ötunno e de primmaveia.
Pròpio pe-a seu poxiçion geografica, o baçî da Magra o l'é soggetto à tanta ægua, coscì che tutti i anni ghe peu ëse di gròssi derlui; da-i dæti do Serviçio Idrografico Naçionale do Ministëio di Travaggi Pubrichi se peu vedde che, in generale, o regimme do sciumme o va comme quello de l'ægua ciuvaña, con di gròssi derlui e de secche ben marcæ.
A portâ ciù bassa in assoluto mai toccâ a l'é de 5 m³/s e quella ciù erta, inte l'alluvion di 25 d'ottobre do 2011, a l'à passou de tanto o valô stramesuou de 5.000 m³/s.
Sti derlui pòrtan de spesso à de inondaçioin[3], in generale into træto finale do sciumme, donde gh'é l'influensa ascì do movimento de ægue do Mâ Ligure, che de vòtte o peu contrastâ o scoâ de ægue do sciumme. Tra o 2009 e o 2011 gh'é stæto ben quattro inondaçioin che an destruto doe vòtte o ponte da Colombiera e allagou de case e de atre struttue: doe do 2009[4], uña do 2010[5] e a ciù grave do 2011, ch'a l'à provocou di danni no solo che a-a foxe ma ascì za da-o træto medio-erto inta zöna de Aulla.
L'urtimo derluio da Magra o l'é stæto a-i 28 de zenâ do 2025, insemme à unna fòrte ondâ de tempo grammo. Inte l'evento o sciumme o l'é stæto misso in allerta rossa e o l'à razzonto un neuvo record de portâ (sensa tegnî conto di eventi do 2011). À l'idròmetro do ponte da Colombiera l'é stæto registrou unna portâ de 1.375 m³/s. No gh'é stæto di danni.[6]
Fauna
[modìfica | modìfica wikitèsto]
E ægue do sciumme en ricche de pesci: into corso de sotta da Magra gh'é ciù de 30 speçie, tra quelle do pòsto e quelle portæ inte ægue da provinsa de Spezza pe-e competiçioin de pesca; tra tutte a truta irridâ, a truta fario, a tenca, a savetta, a lasca, a scardoa, a carpa, o pescio rosso, o persego, o pescio gatto e o lusso; verso a foxe gh'é ascì tante speçie de mâ, che remontan a corrente pe di chillòmetri.
E rive en abitæ da-o mesengon, a vorpe, o pòrco sarvægo, a nutria (ch'a no l'é do pòsto); ma mascime da-i öxelli: l'öchin, o magron, a cornaggia grixa, etc.; e o l'é un ambiente bon pe-e speçie de passo, che se ghe ferman ascì pe longo tempo, de spesso pe fâghe o nio.
Stöia
[modìfica | modìfica wikitèsto]- A Magra a l'é vegnua importante inte l'etæ romaña a-a fin da Guæra soçiale, quande do 88 a.C., insemme a-o sciumme Rubicon, a l'é stæta definia comme confin do territöio italian ch'o gödiva da çittadinansa romaña.[7] De fæto, pe-i Romoen l'«Italia» comme entitæ geografica e amministrativa a no comprendeiva ni e isoe (Siçilia e Sardegna) ni a Cianua padaña.[8]
- Inti urtimi giorni do marso do 1814, a-a fin da campagna d'Italia, a Magra a l'é stæta a-o çentro di scontri tra e truppe do Napolion do generale Jean Victor Rouyer e e truppe da sesta coaliçion condute da-o generale William Bentinck, in particolâ inta battaggia de Lerxi e inta preisa de Spezza.[9]
- «Novelle di Valdimagra» a l'é unna de ciù importante euvie letteräie do Pietro Ferrari, ch'o l'ambienta 15 conti curti inte campagne e inti paixi d'in gio a-a parte erta da vallâ da Magra, pöcassæ da Pontremoli à Filattiera e Bagnon. I 15 conti do Ferrari fan referensa a-i pòsti tanto amæ e à de persoñe squæxi delongo existie pe dabon stæte conosciue da lê pe mezo di conti che se contava in cà seu; o libbro de conti «Novelle di Valdimagra» o l'é stæto pubricou co-o pseudònimo de «Pietro da Pontelungo» do 1944 inte 100 còpie da-a Tipografia Artigianelli de Pontremoli, e o representa fòscia uña de ciù interessante contribuçioin a-a «picciña stöia» da Lunigiaña, ch'a ne permette de vive torna de atmosfere, di sentimenti, de pascioin, di coî e di profummi de un mondo oua scentou, ma a-o tempo da seu pubricaçion ancon inta memöia e inti conti de tanti.
Nòtte
[modìfica | modìfica wikitèsto]- ↑ (IT) Massimo Fanfani, Fiumi femminili, fiumi maschili, in sce accademiadellacrusca.it, 27 de luggio do 2015. URL consultòu o 15 lùggio 2026.
«Il fiume Magra oggi risulta trattato generalmente come maschile, anche se molti in Toscana continuano a sentirlo femminile» - ↑ (IT) il Documento Autorità di Bacino (PDF), in sce adbmagra.it. URL consultòu o 15 lùggio 2026 (archiviòu da l'url òriginâle o 9 màrso 2016).
- ↑ (IT) William Domenichini, Tabula rasa mercificata, in sce Informazionesostenibile.info. URL consultòu o 15 lùggio 2026 (archiviòu da l'url òriginâle o 2 màrso 2012).
- ↑ (IT) William Domenichini, I nuovi percorsi dell'acqua, tra cambiamenti climatici e mutamenti territoriali, in sce informazionesostenibile.info. URL consultòu o 15 lùggio 2026.
- ↑ (IT) William Domenichini, Se Maometto non va alla montagna, la montagna frana, in sce informazionesostenibile.info. URL consultòu o 15 lùggio 2026 (archiviòu da l'url òriginâle o 6 zùgno 2013).
- ↑ (IT) ARPAL, La piena del Magra: una misura record per gli idrologi di Arpal, in sce arpal.liguria.it, 4 de frevâ do 2025. URL consultòu o 15 lùggio 2026.
- ↑ (IT) Gisella Bassanelli Sommariva, Introduzione agli studi giuridici, Maggioli Editore, 2013, p. 420, ISBN 978-88-916-0106-3.
- ↑ (IT) Vincenzo Arangio-Ruiz, Storia del diritto romano, 7ª ed., Napoli, 1988, pp. 197-200.
- ↑ (IT) La battaglia del golfo (PDF), in La Gazzetta della Spezia, n. 4, Spezza, marso 2014, pp. 19-31.
Atri progetti
[modìfica | modìfica wikitèsto]
Wikimedia Commons a contêgne di files in sce Magra
