Aloe vera
E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.| Aloe vera | ||
|---|---|---|
 | ||
A. vera | ||
| Clasificacion taxonomico | ||
Division:
Clase:
| ||
| Especie | ||
| Aloe vera (L.) Burm.f., 1768 | ||
| Sinonimo | ||
| ||
Imagen riba  Wikimedia Commons | ||
Aloe vera riba  Wikispecies | ||
| [Edita Wikidata] · [Manual] |
Aloe (Aloe vera) ta un yerbe suculento semper berde di famia Asphodelaceae.[1]
Nomber
[editá | editá fuente]E termino "aloe" ta wordo aplica comunmente na un grupo di mas cu 500 especie di mata nativo di Africa, Madagascar, i Peninsula Arabe.[1] Sentebibu ta un otro nomber comun conoci na Corsou y Boneiro.[2]
E nomber cientifico vera, derivá for di latin, ta nifica "berdadero".[3]
Distribucion y habitat
[editá | editá fuente]A. vera ta aparece den areanan tropical y subtropical. E ta nativo na region zuidoost di Peninsula Arabe, den seronan di Al-Hajar na Oman. A. vera ta habita areanan exponi cu piedra den clima seco.[1]
| Status | Distribucion |
|---|---|
| Nativo | Oman |
| Introduci | Isla Abou · Antias Hulandes · Archipielago Juan Fernández · Argelia · Islariba · Arizona · Aruba · Ascension · Assam · Bahamas · islanan Baleares · Bangladesh · Bermuda · Bolivia · Islanan Canaria · Cabo Verde · Islanan Cayman · China Sur-Sentral · Chipre · Islanan Cook · Costa Rica · Cuba · Dependencia federal di Venezuela · Ecuador · Islanan oriental di Egeo · El Salvador · Estadonan di Golf · Etiopia · Florida · Islanan Galapagos · Grecia (incl. Creta) · Guatemala · Haiti · Hawaii · Honduras · India · Italia · Jamaica · Libano y Siria · Libia · Madeira · Mauritius · Mexico · Golf di Mexico · Morocco · Nepal · Nicaragua · Pakistan · Palestina · Peru · Puerto Rico · Portugal · Queensland · Republica Dominicano · Réunion · Saudi Arabia · Sicilia · Sint Helena · Spaña · Sri Lanka · Texas · Tailandia · Trinidad y Tobago · Tunesia · Turkia · Islanan Turks y Caicos · Venezuela · Yemen |
Descripcion
[editá | editá fuente]A. vera ta un mata sin of cu troncon chikito cu ta alcansa un largura di 60–150 cm.[4] E tin blachi berde, cuero diki, cu rand di djente chikito. E mata ta produci flor durante zomer riba un taki cu por crece te cu 90 cm largo. E flornan ta colga di e taki y cada flor tin un petalo tubolar di 2–3 cm color geel.
Reproducion
[editá | editá fuente]A. vera por propaga (a)sexual via su flor via rizoma (yiu cu ta nace na base di e mata).[5][6]
Taxonomia
[editá | editá fuente]A. vera a wordo describi originalmente como Aloe perfoliata var. vera door di Carl Linnaeus na 1753.[8] E especie a boble wordo describi na 1768 door di Nicolaas Laurens Burman como Aloe vera (den Flora Indica) y Philip Miller como Aloe barbadensis (den Gardner's Dictionary) dies dia despues di Burman.[9]
A. vera tin diferente sinonimo, inclui A. barbadensis, A. vulgaris y A. perfoliata var. vera. Tecnicanan basa riba comparacion di DNA ta indica cu A. vera cerca relaciona cu especie A. perryi, un especie endemico na Yemen, y tambe cu A. forbesii, A. inermis, A. scobinifolia, A. sinkatana, y A. striata. E ausencia di populacion natural a haci algun autor sugeri cu A. vera por tin un origen hibrido.
Cultivacion
[editá | editá fuente].jpg)
.jpg)
A. vera ta popular como mata ornamental, specialmente den hardin cu mester poco awa. E mata ta popular bou di e hardinero moderno debi na su reputacion como "mata medicinal" y pa su flornan interesante, su forma y su suculencia. E suculencia ta hasi e posibel cu e especie por sobrevivi den areanan cu ta ricibi tiki yobida, hasiendo e ideal pa un hardin di baranca of hardin cu mester poco awa. E mata ta resisti secura, pero no por tolera ni vries ni sneeuw.
Den hardin of pochi, e mester tera cu bon drenahe. Cultivacion den pochi ta pidi pa un mescla di gordura pa cadushi of suculento. Aloe vera ta sensibel pa awa di mas y por dañá si tera no drena bon.
Agricultura di aloe ta tuma lugar riba gran scala den paisnan manera Aruba, Mèxico, India, China, Spaña, Kenia, Tanzania y Sur Africa. E Royal Horticultural Society a otorga e mata su Award of Garden Merit.
.jpg)
Rond 1840, A. vera a wordo introduci na Aruba, Boneiro y Corsou. Entre e tres islanan, Aruba a bira e productor y exportado di mas grandi na mundo. Entre 1906 y 1920, mas di 2/3 parti di Aruba tabata cubri aloe, ganando e nomber di "Isla di Aloe".
Awendia e cultivacion A. vera ta tuma luga riba scala chikito na Hato (Aruba). Akinan ta unda compania Aruba Aloe Factory a wordo funda na 1890 door di Cornelis Eman.[10][11]
Aloe ta un simbolo nacional na Aruba, y representa riba escudo di Aruba como e prome industria di Aruba.
Uzo
[editá | editá fuente]Aloe por wordo haña den varios producto pa consumidor manera bebida, crema pa cuero, cosmetica, pomada of den forma di gel pa trata kemadura chikito y kima door di solo. Tin tiki evidencia clinico tocante efectividad y siguridad di uzo di su extracto como cosmetica y medicina.
.jpg)
Dos substancia di A. vera, esta gel transparente y latex geel, ta wordo uza pa productonan comercial. Gel di aloe tipicamente ta wordo uza den crema pa condicionnan di cuero manera kemadura, herida, grawatashi, psoriasis of cuero seco. Latex di aloe ta wordo uza riba su mes of en combinacion cu otro ingrediente via ingestacion pa alivia constipacion. Latex por wordo obteni den un forma seco yama resina of "djus di aloe seco".
Medicina topical y posibel efectonan secundario
[editá | editá fuente]Aloe vera por wordo prepara den forma di gel, crema, habon of cosmetica pa uza riba cuero como medicina topical. Pa hende cu alergia di aloe vera por haya un reaccion riba cuero cu por ta dermatitis di contacto, cu e cuero birando cora y ta grawata, dificultad pa hala rosea of hinchamento di cara, lip, lenga of garganta.
Suplemento pa dieta
[editá | editá fuente]Aloin, un compuesto haña den e latex semi-likido di algun especie di Aloe tabata un producto comon den productonan laxativo no prescribi na Merca te cu aña 2002 , ora cu e Food and Drug Administration a prohibi e ingrediente paso e productornan a faya den provee e data di siguridad necesario. Aloe vera ta potencialmente toxico, cu efectonan secundario tumando luga na sierto dosis sea consumi oralmente of topicalmente. Asina mes cu e toxicidad por ta menos ora kita aloin durante procesamento, ingestacion di Aloe vera den dosis nan halto por induci efectonan secundario manera, dolor abdominal, diarea y hepatitis. Ingestacion cronico di Aloe vera (dosis 1 gram pa dia) por causa efectonan peligroso manera, hematoria, perdemento di peso, desorden cardiaco of di riñon.
Juice di Aloe vera ta ser adverti como un producto cu por soporta e salud di e sistema digestativo, pero no tin ni evidencia sientifico, ni aprobacion regulatorio cu ta afirma esaki. E extractonan y cantidadnan tipicamente uza pa e objectivonan aki ta parse di ta depende di e dosis pa efectonan toxico.
Medicina tradicional
[editá | editá fuente]A. vera ta wordo uza den medicina tradicional komo un tratamento di cuero. E prome registro di su uzo ta apaerece for di e di cuater milenio prome cu nos era. Aloe tambe a wordo menciona den Juliana Anicia Codex na aña 592.
Mercancia
[editá | editá fuente]Aloe vera ta wordo uza pa kleenex caminda e ta ser promovi como hidratante y anti iritante pa reduci scafmento di nanishi ora uza kleenex. Ta comun pa companianan di cosmetica pone sap of otro derivacion di Aloe vera den productonan manera makiyahe, kleenex, habon, crema pa hidrata, crema pa proteccion contra solo, sensia, crema pa feita of shampoo. Un recensia di literatura academico ta nota cu e inclusion di aloe den varios producto higienico ta debi na su “efecto pa hidrata”.
Toxicidad
[editá | editá fuente]Ingestacion oral di extracto di un blachi di Aloe vera no descoloriza ta riba un lista di California Office of Environmental Health Hazard Assessment hunto cu “kimiconan cu ta conoci pa e estado [di California] pa causa cancer of toxicidad reproductivo”.
Uzo di Aloe vera topicalmente no ta wordo asocia cu efectonan secundario significativo. Ingestacion oral di Aloe vera ta potencialmente toxico y por causa dolor abdominal of diarea cu en turno ta baha e absorbacion di otro medicacion. Gel di Aloe vera ta wordo uza comercialmente como ingrediente den yoghurt, bebida y algun dessert, pero na cierto dosis halto su propiedadnan toxico por ta severo ora esaki wordo consumi oralmente. Uzo di A. vera topical den cantidad chikito tin hopi chens pa no ta peligroso.
Interaccion cu medicacion prescribi
[editá | editá fuente]Ingestacion di Aloe vera por tin interaccion peligroso cu medicacion prescribi manera esnan pa trata bloodclot, diabetis, malesa di curason, medicamento pa baha nivel di potasio y diureticonan pa menciona algun.
Referensia
|
