close
Vai al contenuto

Keir Dullea

Da Wikipedia.

C'l artìcul chè 'l è scrit in Miranduléś Emiliàn

Keir Dullea tòlt śò in dal 1962


Keir Atwood Dullea (Cleveland, 30 ad Maǵ dal 1936, a s lèś [ˈkɪər dʊˈleɪ] in ingléś) 'l è 'n atōr americàṅ, famóś p'r avēr fat la part d'l astrunàuta David Bowman in 2001: Odissea nello spazio (1968) ad Stanley Kubrick e in 2010 - L'anno del contatto (1984) ad Peter Hyams.

Biugrafìa

[mudéfica la surzéia]

Fiōl ad Robert Dullea e dla Margherita Ruttan, al crés in dal Greenwich Village ad New York in dua i sò genitōr i ìvan vèrt na librerìa. Al s làurea a la George School in Pennsylvania par pò far al sò debùt da atōr a 'l inìsi di an Ssanta tulénd part a soquànt lavōr par la televiśiòṅ. In dal 1961 a 'l ém vist in dal drama Le canaglie dormono in pace cun prutagunìsta Don Murray.

In séguit 'l à fat da spés di persunàǵ śōvan cun di prubléma emutìṿ, cuma in dal film David e Lisa (1962), in còpia cun la Janet Margolin, e Bunny Lake è scomparsa (1965) 'd Otto Preminger cun prutagunìsta Laurence Olivier. Al s fà nutàr anc in atri pelìculi cuma Madame X (1966), cun la Lana Turner e John Forsythe, La volpe (1967), in dua al s insfìlsa cuma na vólp in un pulàr in dal rapòrt fra dó dóni ch'i vìvan da par lōr in na faturìa canadéśa, e De Sade (1969), film biugràfic cun la Senta Berger in dua lò 'l fava la part dal Marchéś de Sade.

In di an Stanta a 'l arcurdém p'r al śal itagliàṅ Il diavolo nel cervello (1972), in còpia cun la Stefania Sandrelli, p'r al film ad scarésa Black Christmas - Un Natale rosso sangue (1974), in dla part 'd un ragàs nevròtig ch'al n vōl minga ch'la sò muróśa la vaga a 'burtìr, e in dal drama Il leopardo nella neve (1978), faghénd 'n èx pilòta 'd màchini armàś sòp dòp 'n incidènt ch'al s inamóra dla Susan Penhaligon.

Àtar sò film impurtànt i èṅ stâ Brainwaves - Onde cerebrali (1983), thriller dramàtic 'd Ulli Lommel cun la Vera Miles e Tony Curtis, al film 'd asiòṅ Cacciatore di alieni (2003), a fiànc ad James Spader, al film ad spiunàǵ The Good Shepherd - L'ombra del potere (2006), insém a Matt Damon, Robert De Niro, l'Angelina Jolie, Alec Baldwin, William Hurt, Timothy Hutton e John Turturro, la cumèdia Un marito di troppo (2008), in dua 'l à incruśâ l'Uma Thurman, Jeffrey Dean Morgan e Colin Firth, e 'l fantasientìfig Space Station 76 (2014) cun Patrick Wilson e la Liv Tyler.

Dullea al s è spuśâ quàtar vòlti.

Filmugrafìa

[mudéfica la surzéia]
Gl'óri nûdi (1964)
Óndi serebràli (1983)

Culegamènt estéran

[mudéfica la surzéia]

Àtar prugèt

[mudéfica la surzéia]
Estratto da "https://eml.wikipedia.org/w/index.php?title=Keir_Dullea&oldid=168577"