breakdance

Breakdance består i hovudsak av tre ulike typar steg:

Toprock er steg som dansaren utfører mens hen står. Stega blir brukt i starten av dansen for å få nok fart til å gjennomføre ei samansett bevegelse.

Freeze er å låse eller stoppe kroppen i ei stilling.

Downrock er steg som dansaren gjør mens hen har hendene i kontakt med golvet. Det er fleire typar downrock:

• Drops er trinn der dansaren går frå ståande stilling og ned på golvet.
• Footwork er måtar å bruke beina på når ein er nede på golvet. Ein kan til dømes svinge på beina, sparke, eller bruke små samansette steg.
• Spins er å snurre rundt seg sjølv nede på golvet. Ein kan snurre på ryggen, hendene, hovudet eller andre delar av kroppen.
• Power moves er mange spins som heng saman.
• Blowups er kjappe og eksplosive bevegelsar for å overraske publikum, for eksempel ein salto.
• Air moves er samansette trinn der heile kroppen er i lufta på eit tidspunkt, for eksempel hopp og salto.
• Transitions er steg som dansaren brukar for å gå frå eit triks til eit anna. Desse trinna skapar flyt i breakinga.

Mange breakdansarar kler seg i romslege klede. Mange brukar også ei slags hue på hovudet for å kunne utføre fleire power moves der dei har hovudet i bakken.

I ein breakdance-konkurranse er det to personar eller grupper som konkurrerer mot kvarandre. Først dansar den eine dansaren eller gruppa, og så bytar dei. Det er vanleg at dansarane finn på stega og samansettingane der og då. Ein dommar eller jury kårar vinnaren.

Konkurransane har også ein vert som blir kalla MC. Verten leiar konkurransen, ropar opp deltakarane og skapar stemning i publikum. Ein DJ står for musikken.

Filmen Beat Street frå 1984 starta ei stor interesse for hiphop og breakdance i Noreg. I 2006 vann breakaren Adil Khan det norske TV-programmet Dansefeber. Dette gjorde breakdance meir populært. Seinare har fleire crew vore med på TV-program som Norske Talenter.

• hiphop
• dans