Nikon

Nikon Corporation (Япон: 株式会社ニコン, Kabushiki Gaisha Nikon, монгол дуудлага нь "Никон") - дүрс бичлэгийн төхөөрөмж, голчлон камер, линз үйлдвэрлэх чиглэлээр нарийн мэргэшсэн Японы компани юм. Энэ нь оптик багаж хэрэгсэл хөгжүүлэх, оптик шил үйлдвэрлэх чиглэлээр дэлхийн хамгийн том тэргүүлэгчдийн нэг юм.

Nikon компани Mitsubishi Group-ийн бүрэлдэхүүнд ордог. 1917 оны 7-р сарын 25-нд Nippon Kogaku K.K. (Nippon Kogaku Kabushiki Kaisha) буюу Ниппон Коогакү Коогёо нэрээр үүсгэн байгуулсан бөгөөд 1988 онд нэрээ сольсон байна. Ерөнхийлөгч нь Токүнари Мүнэаки. Төв байр нь Токиод байралдаг.

Түүх

Nikon корпорац нь 1917 онд гурван оптик тоног төхөөрөмж үйлдвэрлэгч (Seisakusho, Iwaki Glass Co, Fujii Lens)-ийг Nippon Kogaku Kokyo K.K. нэртэй компани болгон нэгтгэснээр байгуулагдсан. Тус компани нь Японы тэнгисийн цэргийн хүчинд зориулсан оптик багаж хэрэгсэл үйлдвэрлэдэг байжээ.

1932 онд "Nikkor" линзний брэндийг бүтээсэн юм. Дэлхийн хоёрдугаар дайны үед тус компани 19 үйлдвэр, 23,000 ажилтантай болж өргөжсөн юм. Тус компани Японы армид зориулж дуран, линз, перископ, харааны төхөөрөмж үйлдвэрлэж байжээ. Дайны дараа тус компани ганц үйлдвэрт иргэний бүтээгдэхүүн үйлдвэрлэж эхэлсэн. Эхэндээ дунд зэргийн форматтай хос линзтэй рефлекс камер (6x6 см) боловсруулсан боловч жижиг форматтай тоног төхөөрөмж боловсруулах шийдвэр гаргаж, 1946 онд Nikon брэндийн дор анхны 35 мм-ийн камер бүтээжээ. Үүний зэрэгцээ 35 мм-ийн Canon камерын линзний нийлүүлэлт зогссон. Nikon нь компанийн нэр болсон. 1948 онд Nikon камерууд Хонконг руу экспортолж эхэлсэн байна.

1962 онд тус компани Токиогийн одон орон ажиглалтын төвд зориулж 91 см-ийн тусгал дуран бүтээн үйлдвэрлэжээ. 1974 онд Кисогийн ажиглалтын төвд зориулж 105 см-ийн Шмидтийн катадиоптрик дуран бүтээжээ. 1963 онд сольж болох линзтэй Nikonos усан доорх камер худалдаанд гаргасан юм. 1971 онд Nikon F-г орлох зорилготой Nikon F2 камер худалдаанд гарсан бөгөөд мэргэжлийн гэрэл зурагчдын дунд их алдартай болсон байна.

1990 онд тус компанийн салбар Тайландад нээгдэж, жилийн дараа үйлдвэр баригджээ. Тус үйлдвэрт 2000 он гэхэд 2000 хүн, 2004 он гэхэд аль хэдийн 8000 хүн ажиллаж байжээ. 1991 онд Nikon компани НАСА-тай хамтран Nikon F4 болон тухайн үеийн шинэ CCD матриц дээр суурилсан дэлхийн анхны дижитал SLR камеруудын нэгийг 1: мегапикселийн нягтралтайгаар бүтээжээ. Камерыг Сансрын Шаттл хөтөлбөрт идэвхтэй ашиглаж байжээ. 1995 онд "Fujifilm" компанитай хамтран дижитал камерын туршилтын загварыг боловсруулсан. 1997 онд авсаархан дижитал камер Nikon Coolpix 100 гарсан. 1999 онд анхны мэргэжлийн дижитал SLR камер Nikon D1 гарсан. 1996 онд Nikon F5 камер, 2004 онд Nikon F6 камер үйлдвэрлэж эхэлсэн байна.

2010 онд Nikon D3100 болон Nikon D7000 сонирхогчдын камеруудыг танилцуулсан. 2011 онд өөр нэгэн сонирхогчийн камер болох Nikon D5100 худалдаанд гарсан. 2012 онд мэргэжлийн Nikon D4 болон хагас мэргэжлийн Nikon D800, Nikon D800E, Nikon D600, мөн сонирхогчдын Nikon D3200 болон Nikon D5200 камеруудыг танилцуулсан. 2013 онд Лаост Nikon Lao Co., Ltd. компанийг байгуулсан.

Үйл ажиллагаа

Орлогын хувиар нь авч үзвэл, Nikon-ы үйл ажиллагааны гол бүс нутгууд нь Хятад (27%), АНУ (25%), Япон (16%), Европ (16%) юм.

2006 оноос хойш тус компани хальсан камер үйлдвэрлэхээ бараг бүрэн зогсоож (бүрэлдэхүүнд зөвхөн хоёр загвар үлдсэн - Nikon F6 болон Nikon FM10), дижитал гэрэл зурагт анхаарлаа хандуулсан.

2021 оны байдлаар Nikon нь дижитал камерын борлуулалтаараа дэлхийд 3-рт жагсаж, зах зээлийн эзлэх хувь нь 13.7% (Canon 49.7%, Sony 22.1%) байв.