Irving Saladino

Irving Saladino
Statsborgarskap	Panama
Fødd	23. januar 1983 (43 år) Colón
Idrett	friidrett
Tok del i	Sommar-OL 2012, Sommar-OL 2008, Sommar-OL 2004

Irving Jahir Saladino Aranda (fødd 23. januar 1983) er ein panamansk tidlegare friidrettsutøvar frå Colón. Han vart verdsmeister i lengdehopp i 2007 og olympisk meister i same øvinga i 2008. Saladino sin personlege rekord på 8,73 meter er frå 2008.

Aktiv

Saladino hoppa 8,12 meter i 2004 og passerte dermed 8-metersgrensa. Året etter hoppa han 8,51 m i sterk medvind og 8,29 m under godkjende vindtilhøve. I Helsinki-VM vart han målt til 8,20 m i medvind på 2,8 sekundmeter og enda på sjetteplassen. Ved hall-VM 2006 i Moskva kom han på andreplass med 8,29 m, bak Ghanas Ignisious Gaisah på 8,30 m og framom Italias Andrew Howe på 8,19 m. Sommarsesongen 2006 vann han fem av seks Golden League-stemne: Oslo, Roma, Zürich, Brussel, Berlin og i verdsfinalen i Stuttgart.

Under panamerika-leikane i Rio de Janeiro i juli 2007 sigra Saladino med eit hopp på 8,28 m. I VM-finalen i Osaka 30. juli 2007 tok Saladino leiinga i tredje omgang med 8,46 m. I sitt siste forsøk passerte Andrew Howe han med 8,47 m. I det aller siste hoppet i tevlinga la Saladino på til 8,57 m og vart verdsmeister med ny latinamerikansk rekord. Dette var Panamas fyrste gullmedalje i ein verdsmeisterskap i friidrett.

Den 24. mai 2008 i Hengelo presterte Saladino livsbeste 8,73 meter. I august same året vann han gullmedaljen i lengdehopp under OL i Beijing. Med 8,34 m i fjerde omgang tok han føringa framom Godfrey Khotso Mokoena og beheldt den til tevlinga var over. Med dette hoppet vann han Panamas fyrste olympiske gullmedalje. Ved sin retur til Panama vart Saladino motteken av president Torrijos, og han fekk ein premie på 50 000 dollar.

Sommaren 2009 hoppa Saladino 8,63 m i Eugene i Oregon, men vart likevel slått av Dwight Phillips som nådde 8,74 m og sette stemnerekord. Seinare det året hoppa Saladino 8,21 m i kvalifiseringa ved VM i Berlin, men bomma totalt i finalen. I juli 2011 sigra han med 8,40 i eit GL-stemne i Saint-Denis. Under søramerika-leikane i Santiago de Chile i mars 2014 vann han si siste gullmedalje med 8,16 meter. Same året i august la han opp.

Medaljar og plasseringar i internasjonale meisterskap

• OL 2004 i Aten: Utslått i kvalifiseringa (7,42 m=nr 36)
• VM 2005 i Helsinki: Nr 6 – 8,20 m
• VM 2007 i Osaka: Gullmedalje – 8,57 m, framom Andre Howe (8,47 m)
• OL 2008 i Beijing: Gullmedalje – 8,34 m, framom Khotso Mokoena (8,24 m)
• VM 2009 i Berlin: Nr 12 (-)
• VM 2011 i Daegu: Utslått i kvalifiseringa (7,84 m=nr 22)
• OL 2012 i London: Utslått i kvalifiseringa (-)

Kjelder

• Denne artikkelen bygger på «Irving Saladino» frå Wikipedia på engelsk, den 22. august 2015.

• World Athletics