Grunge
.jpg)
Lo grunge es al sens restrech un sosgenre del ròck que, en avent obtengut una popularitat internacionala a la debuta de las annadas 1990, es clarament vengut al sens larg un fenomèn socio-cultural.
Lo grunge es aparegut als Estats Units a la debuta de las annadas 1990 a l'entorn de la ciutat de Seattle (Estat de Washington). Designava alara la dinamica populara montanta a l'entorn de la scèna ròck locala, puèi s'es espandit per evocar mantuns autres grops de la scèna "alternativa" americana. D'unes d'aqueles grops coma Pearl Jam, Soundgarden, Alice in Chains, The Smashing Pumpkins e sustot Nirvana van quitament aver un succès mondial, e vendre de milions d'albums, contribuïssent aital a far del grunge al sens larg una mòda populara dins los païses occidentals pendent las annadas 1990.
Al sens musical del tèrme, la musica grunge tròba a l'encòp son inspiracion dins lo punk ròck e lo heavy metal, en assument tanben las influéncias de divèrses grops cultes contemporanèus del ròck independent american (Sonic Youth, R.E.M., Pixies etc). Se caracteriza per de guitarras fòrça saturadas e de paraulas exprimissent sovent d'angoissas existencialas (dins la dralha del famós eslogan "No Future" del movement punk).
Per sinergia, lo grunge a incontestablament ajudat a rendre lo metal popular dins las annadas 1990 (Metallica, Guns N' Roses...), e recipròcament. A tanben engendrat un reviscòl espectacular del genre punk ròck : cas eloquent de la scèna californiana (Offspring, Rancid, Green Day, NOFX...).
E mai se musicalament parlant, pel son de guitarras saturadas per exemple, lo grunge sembla a de metal, se'n distinguís netament per l'aspècte tecnic (exactament coma foguèt lo cas a la fin de las annadas 1970 entre lo punk ròck rapòrt al hard ròck e al ròck progressiu), pr'amor d'un jòc fòrça mai simple, fòrça mens tecnic, que ne fa un estili espurat plan diferent d'autres genres de ròck mai sofisticats de la meteissa periòda coma lo heavy metal vertadièr.
Los grops grunge se distinguisson tanben dels autres grops de ròck de l'epòca per l'estetica : s'afichan destibat, quitament clarament negligit, un còp de mai dins l'esperit punk, es a díser mai "classa populara" (bragas esperrecadas per exemple : lo mot american "grunge" evòca la lordièra, per soslinhar aquel costat negligit assumit), que non pas "show biz" coma per exemple lo glam ròck.
Lo tèrme grunge es primièr utilizat per Mark Arm, cantaire de Green Riblar e mai tard de Mudhoney, per descriure lo son de Seattle. En 1981, ja emplega aquel mot dins una letra adreçada al fanzine Desperate Times per descriure son pichon grop amator de l'epòca, Mr. Epp and the Calculations.
Lo movement grunge se popularisa alavetz a l'entorn del labèl de musica independent Sub Pop basat a Seattle a la fin de las annadas 1980, pr'amor qu'aquel labèl a distribuït grops que van conéisser una capitada comerciala espectaculosa a la debuta de las annadas 1990. Dos albums sortits en 1991 en particular van aver un resson màger : Nevermind de Nirvana (ambe lo tube mondial "Smells like teen spirit" en 1991 o 1992 segon los païses) e Ten de Pearl Jam. Aquelas capitadas van far del grunge lo genre dominant del ròck d'una bona partida de las annadas 1990, ambe un declin de caps la fin d'aquesta decenia.
