Сонгогч Та Монгол Улсын Ерөнхийлөгчийн сонгуулийн тухай хуульд заасны дагуу  өөрийн харъяа хэсгийн хорооны санал авах байранд иргэний үнэмлэхтэйгээ очиж,  биеийн давхцахгүй өгөгдөл /гарын хурууны хээ/-өө иргэний бүртгэлийн итгэмжлэгдсэн ажилтанд шалгуулна.

Иргэний бүртгэлийн итгэмжлэгдсэн ажилтнуудын сургалт, семинар дууссантай холбогдуулан сонгогчдийн нэрийн жагсаалтыг эцсийн байдлаар хэсгийн хороо тус бүрээр гаргаж аймаг, нийслэлийн хэсгийн  нийт 1896 хэсгийн хороонд хүлээлгэн өгч дууслаа.

Энэ удаагийн ерөнхийлөгчийн сонгуулиар улсын хэмжээнд 1896 хэсэгт 2501 иргэний бүртгэлийн итгэмжлэгдсэн ажилтан ажиллуулахаар тус газар бэлтгэл ажлыг хангаад байна. Энэ хүрээнд итгэмжлэгдсэн ажилтнуудтай гэрээ байгуулан ажилд оруулсан бөгөөд тэдэнд зориулсан эрх зүйн болон програмын сургалтыг энэ сарын 22-ны өдөр эхлүүллээ.

Тус газар сонгуулийн санал авах өдөр сонгогчдийг бүртгэх, таних тоног төхөөрөмж,  техник хэрэгслийн аюулгүй, найдвартай, хэвийн үйл ажиллагааг хангах зорилгоор 1896 сонгуулийн хэсэг тус бүрт мэдээллийн технологийн 2-3 хүний бүрэлдэхүүнтэй шуурхай баг ажиллуулахаар бэлтгэл ажлыг хангалаа.

Улсын бүртгэлийн ерөнхий газраас Ерөнхийлөгчийн сонгуульд тухай хуульд заасны дагуу 60 хоногийн хугацаанд шилжилт хөдөлгөөнийг улсын хэмжээнд түр зогсоосон бөгөөд улмаар иргэдийн санал өгөх эрхийг хангах зорилгоор хуульд нийцүүлэн анх удаа сонгогч шилжих тухай журмыг батлан хэрэгжүүлэв.

Өнөөдөр Улсын бүртгэлийн ерөнхий газар Сонгуулийн ерөнхий хороо, Гадаад харилцааны яамтай хамтран  сэтгүүлчдэд мэдээлэл хийлээ. Хэвлэлийн хуралд  тус газрын дарга Ц.Пүрэвдорж,  Сонгуулийн ерөнхий хорооны дарга Ч.Содномцэрэн, Гадаад харилцааны яамны Төрийн нарийн бичгийн дарга бөгөөд Гадаадад байгаа иргэдийн санал авах ажлыг зохион байгуулах комиссын дарга Г.Цогтсайхан нар оролцлоо.Монгол Улсын Ерөнхийлөгчийн сонгуулийн тухай хуулийн хэрэгжилт болон  6 дугаар сарын 26-нд улсын хэмжээнд зохион байгуулагдах сонгуулийн үйл явцтай холбогдуулж тал талын бэлтгэл ажлыг хамтран хангаж байна. Тухайлбал, 6 дугаар сарын 16-ний байдлаар улсын хэмжээнд 1.856190 сонгогч саналаа өгөхөөр сонгогчдын нэрийн жагсаалтад бүртгэгдээд байна.

Хуульд заасны дагуу сонгогч сонгогчдын нэрийн жагсаалтад зөрчилтэй эсэхээ харъяа хэсгийн хороонд бичгээр гомдол гаргаж, шийдвэрлүүлэх эрхтэй. Мөн зөрчлөө арилгах болон өөрийн байнга оршин суугаа газрынхаа харъяа хэсгийн хороонд санал өгөх боломжгүй бол тус газраас баталсан журмын дагуу  сонгогчийн шилжих хөдөлгөөн хийлгэснээр санал өгөх эрхээр хангагдах  уг  хугацаа өнөөдрөөр дуусгавар боллоо.

Улсын бүртгэлийн ерөнхий газар, Гадаад харилцааны яам, Сонгуулийн ерөнхий хороо хамтран  гадаадад ажиллаж, амьдарч байгаа иргэдийн санал өгөх асуудлаар сэтгүүлчдэд мэдээлэл хийлээ.

Гадаадад байгаа иргэд Ерөнхийлөгчийн сонгуульд анх удаа санал өгч байгаа бөгөөд энэ удаагийн сонгуульд нийт 6233 иргэн санал өгөх юм байна. Ерөнхийлөгчийн сонгуулийн тухай хуульд заасны дагуу маргааш буюу энэ сарын 14-16-ний  хооронд саналаа өгөх юм.