Ares
- Iste articlo tracta sobre un dios griego. Pa a localidat occitana d'o departamento de Gironda se veiga Arés.
| Ares | |
|---|---|
 Estatua d'Ares en Villa Adriana (Tívoli). | |
Dios | |
| Mitolochía: | Mitolochía griega |
| País: | Antiga Grecia |
| Dios de: | d'a guerra. |
Información personal | |
| Pai: | Zeus |
| Mai: | Hera |
| Relacionau con: | Marte |
Ares (en griego antigo Ἄρης Arês u Ἄρεως Areôs, "conflicto belico") se considera, en a mitolochía griega, o dios olimpico d'a guerra, encara que ye mas bien a personificación d'a fuerza bruta y a violencia, asinas como d'a tabola, confusión y horrors d'as batallas, en contraposición a su chermanastra Atena, que representa a meditación y sabiduría en os afers d'a guerra y proteche a os hombres d'a desferra que fa. Os romanos lo identificoron con Marte, dios romano d'a guerra y l'agricultura (y a qui heban heredau d'os etruscos), pero iste teneba entre éls muita mayor estima.
Lo representan como fillo de Zeus y Hera, encara que existe una tradición posterior seguntes a cual Hera lo concibió en tocar una determinada flor, en o que pareixe estar una imitación d'a leyenda sobre a naixencia d'Hefesto, y ye replegada por Ovidio.
Tamién existe una leyenda similar sobre a naixencia d'Eris, diosa d'a Discordia. O suyo puesto de naixencia y autentica casa yera situau luent, entre os barbaros y tracios, y ta él fuyó cuan fue descubierto chitau con Afrodita.
Os helenos siempre desconfioron d'Ares, talment porque ni sisquiera yera influiu por o esprito de perteneixer a un bando, sino que bella vegada aduyaba a una parte y belatra a l'atra, seguntes le dictaban as suyas inclinacions. A suya man destructiva se veyeba mesmo dimpués d'a desferra provocada por plagas y pasas. Iste caracter salvache y sanguinario de Ares lo feba estar odiau por atros dioses, incluius os suyos propios pais.
Ares estió tamién un adchectivo y epiteto en a epoca clasica: yeran comuns os titols Zeus Areios, Atena Areia y mesmo Afrodita Areia.
