Clive Owen

C'l artìcul chè 'l è scrit in Miranduléś

Clive Owen (Coventry, 3 'd Utóbar dal 1964, a s lèś [ˈklaɪv ˈəʊɪn] in ingléś) 'l è 'n atōr britànig.

In dal 2005 'l à vins un Golden Globe e 'n Prèmi BAFTA, ólt'r a na nomination a i Premi Oscar, p'r al film Closer faghénd al dermatòlug marè dla Julia Roberts. 'L à inóltar ciapâ na secónda nomination a i Golden Globe e una a i Emmy Award p'r Hemingway & Gellhorn in dua lò 'l à fat al scritōr Ernest Hemingway a fiànc dla Nicole Kidman. Atri candidadùri par lò i èṅ rivàdi par la série televiśìva The Knick.

Biugrafìa

Quàrt ad sinc fradèi, Clive a tri an al patìs la fîṅ dal matrimòni di sò genitōr cun sò pàdar Jess Owen, cantànt country, ch'al s in và. Al s davśìna a la recitasiòṅ in dal 1984 par pò frequentàr cun sucès insém a Ralph Fiennes la Royal Academy of Dramatic Art, diplumàd-'s in dal 1987 e faghénd al sò debùt 'l an dòp c'n al drama rumàntig Vroom in dua, insém a 'l sò amìg David Thewlis, al partìs a l'aventùra p'r un lung viàś in màchina, inamurànd-as pò dna dóna divursiàda.

In séguit a 'l ém vist in dal drama Bent (1997), a fiànc ad Ian McKellen, ad Mick Jagger e 'd Jude Law, in dal śal ad Robert Altman Gosford Park (2001), in dal film ad spiunàǵ The Bourne Identity (2002), cun prutagunìsta Matt Damon, in dal thriller I'll Sleep When I'm Dead (2003), in còpia cun la Charlotte Rampling, e in dal drama sentimentàł Amore senza confini in dla part 'd un mèdag idealìsta e arvèrs ch'al và a dar na maṅ in Àfrica.

Dòp al sucès ad Closer ad Mike Nichols (2004), 'l à recitâ in dal noir Sin City (2005), insém a Bruce Willis, Mickey Rourke e la Jessica Alba, in dal thriller Derailed - Attrazione letale (2005), in còpia cun la Jennifer Aniston, in Inside Man (2006), cun Denzel Washington, la Jodie Foster e Willem Dafoe, e in dal drama I figli degli uomini (2006), in dua 'l à incruśâ la Julianne Moore e Michael Caine.

In dal 2007 'l à fat la part d'n èx agìnt 'd uperasiòṅ sóta quaciadùra in dal film 'd asiòṅ Shoot 'Em Up - Spara o muori!, cun la Monica Bellucci a 'l sò fiànc, e qvéla ad Sir Walter Raleigh in dal stòrig Elizabeth: The Golden Age, cun la Cate Blanchett e Geoffrey Rush. Dū an dòp 'l à laurâ in àtar dū filmòṅ cuma The International cun la Naomi Watts e Duplicity cun la Julia Roberts.

Fra i sò ùltim lavōr più imputànt a 'rcurdém al thriller Killer Elite (2011), in còpia cun Robert De Niro, 'l aventuróś Valerian e la città dei mille pianeti (2017), faghénd la part dal catìṿ cmandànt Arun Filitt, e Gemini Man (2019), a fiànc ad Will Smith.