Orkut foi unha rede social propiedade de Google, creada o 19 de xaneiro de 2004 co obxectivo de dotar os usuarios dunha ferramenta para crear novas amizades e manter relacións sociais. O seu nome procede do xefe dos desenvolvedores do proxecto Orkut Büyükkokten, enxeñeiro turco de Google.
Na súa creación pensouse no mercado norteamericano e nun principio foi unha rede fundamentalmente anglófona coa maioría dos seus membros procedentes dos Estados Unidos. Porén desde 2004 os usuarios do Brasil medraron exponencialmente, e na actualidade a maioría dos seus usuarios actuais son do Brasil e da India[1]. No Brasil é o sitio web máis visitado e ten máis de 23 millóns de usuarios[2] na India é o segundo máis visitado. Orixinariamente a sede de Orkut estaba en California pero en agosto de 2008 Google anunciou que o servizo ía ser dirixido desde Brasil por Google Brasil.
