Myndlist
Myndlist eða sjónlistir eru þær fjölbreyttu listgreinar sem byggjast fyrst og fremst á sjónrænni framsetningu. Hefðbundnar greinar myndlistar eru málaralist, teikning, prentlist og höggmyndalist. Nýjar listgreinar eins og klippimyndir, innsetningar, gjörningalist, tölvulist og vídeólist teljast til myndlistar og graff er stundum talið með. Sjónlistir telja líka kvikmyndagerð, ljósmyndun, byggingarlist og nytjalist á borð við iðnhönnun, grafíska hönnun, fatahönnun, innanhússarkitektúr og skreytilist.
Myndlist er aðgreind frá sviðslistum og bókmenntum, þótt skilin séu langt frá því að vera skýr. Almennt þegar rætt er um myndlist er átt við fagurlist fremur en nytjalist eða iðnhönnun, en þegar rætt er um sjónlistir er sjónarhornið víðara. Þetta má rekja til aðgreiningar sem tekið var að gera milli listar og handverks á Vesturlöndum frá 18. öld. Síðan þá hafa listaskólar og listastefnur ýmist lagt áherslu á list sem hreinræktaða sköpun eða samspil sköpunar og handverks. Málverk, teikningar, höggmyndir og grafíkverk voru lengi talin augljósustu dæmin um myndlist, en í samtímanum vinnur myndlistarfólk með ýmsa ólíka miðla á borð við fundna list, bækur, ljósmyndir, mat, innsetningar, gjörninga, tölvuteikningar og svo framvegis.
Tenglar
[breyta | breyta frumkóða]- Þóra Kristjánsdóttir (18. desember 1999). „Elstu nafngreindu myndlistarmenn Íslendinga“. Lesbók Morgunblaðsins. bls. 4-5.
- Gísli Sigurðsson (12. nóvember 1994). „Margt er skrýtið í kýrhaus listasögunnar“. Lesbók Morgunblaðsins. bls. 6-7.
- Gísli Sigurðsson (21. desember 1994). „Gullöldin í norrænni myndlist“. Lesbók Morgunblaðsins. bls. 24-26.
- Gísli Sigurðsson (25. febrúar 1968). „Um hvað eru fuglarnir að syngja“. Lesbók Morgunblaðsins. bls. 4-5.
- Gísli Sigurðsson (3. mars 1968). „Ljóðræn hláka eftir reglustikuskeiðið“. Lesbók Morgunblaðsins. bls. 4-5.
- Gísli Sigurðsson (7. apríl 1968). „Ekki er víst að góð mynd sé fögur“. Lesbók Morgunblaðsins. bls. 8-9.
Enskir tenglar:
- Oxford Art Online upplýsingaveita um myndlist.
