det samiske flagget
Sameflagget er flagget til den samiske nasjonen. Det er eit felles, internasjonalt symbol for alle samar.
Det blir brukt som felles flagg for samar i Noreg, Sverige, Finland og Russland.
I Noreg blir det sidan 2003 flagga med sameflagget på offentlege bygningar på den samiske nasjonaldagen 6. februar.
Sameflagget brukes alle steder der det bor samer. Bildet er fra Lappland som ligger i Finland, men også er en del av Sàpmi.
Sameflagget er påverka av tradisjonelt samisk duodji (kunsthandverk). Fargane raudt, blått, gult og grønt er vanlege på kofter, dei tradisjonelle samiske kleda.
Symbola på flagget har ikkje ei bestemd tyding. Men den delte sirkelen er eit gamalt samisk symbol. I flagget kan den raude halvdelen symbolisere sola og den blå månen. Sirkelen er òg ei vanleg form ein kan kjenne att frå både eldstad, lávvu og samiske trommer.
Sirkelen og stripene i gult og grønt er plasserte i venstre del av flagget. Dette er gjort for at det skal likne på korleis korset er plassert på mange andre nordiske flagg, for eksempel flagga til Noreg og Færøyane.
Det første samiske flagget hadde òg eit raudt og blått felt, med ei gul stripe. Men det var utan sirkelen og den grøne stripa.
Det grønlandske flagget, som er frå 1985, har òg ein delt sirkel plassert til venstre for midten av flagget. Det australske urfolket aboriginane har ein stor gul sirkel i flagget sitt.
Det at andre urfolk har liknande symbol i flagga sine, bidrog til at sirkelen blei lagd til i sameflagget i 1986.
Det samiske flagget og vrengde kofter er viktige symbol for samar som demonstrerer mot vindturbinane, som øydelegg for reindrifta i Fosen i Trøndelag.
Sameflagget er i dag eit vanleg og kjend symbol for det samiske samfunnet og den samiske nasjonen.
Flagget, og fargane frå flagget, blir brukt i mange samanhengar. I skular og barnehagar over heile Noreg brukar mange barn flagget rundt feiringa av den samiske nasjonaldagen.
