შვეიცარიის ქალაქ ნიონში, უეფა-ს სათაო ოფისში 19-წლამდე ვაჟთა ასაკობრივი გუნდების წილისყრა გაიმართა. შესარჩევი ციკლის მეორე რაუნდში, საქართველოს 19-წლამდე ნაკრები B ლიგაში განაგრძობს ასპარეზობას, სადაც ზურაბ ხიზანიშვილის ნაკრები - ბოსნია-ჰერცეგოვინას, დანიას და სან მარინოს დაუპირისპირდება.  B ლიგის მეორე ჯგუფში პირველი ადგილის დაკავების შემთხვევაში, 19-წლამდე ნაკრები ელიტ რაუნდში განაგრძობს ასპარეზობას. ნოემბერში გასამართი ჯგუფის მატჩების მასპინძელი ქვეყანა მოგვიანებით გახდება ცნობილი.  ახალი ფორმატის მიხედვით, საკვალიფიკაციო ეტაპი 3-რაუნდიანი გახდა და A და B ლიგებად დაიყო. ფინალურ ეტაპზე, მესამე რაუნდში, ჯგუფის გამარჯვებული 7 გუნდი მოხვდება, რომლებსაც მერვე გუნდად, მასპინძელი ქვეყანა დაემატებათ. 

17-24 ივნისს, თბილისში, დიდი დიღმის ტექნიკურ ცენტრში და სამტრედიაში, სფფ-ის კახა კალაძის სახელობის საფეხბურთო ცენტრში 15-წლამდე ვაჟთა შორის სასელექციო თამაშები გაიმართება, რომელსაც საქართველოს 16-წლამდე ნაკრების მთავარი მწვრთნელი - სანდრო კობახიძე უხელმძღვანელებს. სასელექციო ხასიათის პროექტი, პირველ ეტაპზე აღმოსავლეთ საქართველოს მოიცავს, შემდეგ კი დასავლეთში გადაინაცვლებს, სადაც შერჩევას ჯამში 72 ახალგაზრდა მოთამაშე გაივლის. შემაჯამებელი ფაზა, 24 ივნისს სამტრედიაში, აღმოსავლეთ და დასავლეთ საქართველოს რეგიონულ ნაკრებთა მატჩით დასრულდება.

11 ივნისს, ნიონში, 17 და 19-წლამდე გოგონათა ნაკრები გუნდების ევროპის ჩემპიონატის საკვალიფიკაციო ეტაპის პირველი რაუნდის წილისყრა გაიმართა. საქართველოს 17-წლამდე ნაკრები B ლიგის მეოთხე ჯგუფში მოხვდა. ჩვენი გუნდის მეტოქეები უელსი, ჩრდილოეთ მაკედონია და ლუქსემბურგი იქნებიან. მატჩები 25 ოქტომბრიდან 31 ოქტომბრის ჩათვლით საქართველოში გაიმართება.  B ლიგის მეორე ჯგუფში ითამაშებს 19-წლამდე ნაკრები, რომელიც ირლანდიას, ბულგარეთს და სომხეთს შეხვდება. 7-13 ოქტომბერს, აღნიშნულ ჯგუფის მატჩებს ბულგარეთი უმასპინძლებს.  მატჩები შემოდგომაზე გაიმართება და A ლიგის საგზურს ჯგუფების გამარჯვებულებთან ერთად საუკეთესო მეორეადგილოსანი მოიპოვებს.