Ben Kingsley
Sir Ben Kingsley | |
|---|---|
 Ben Kingsley árið 2014. | |
| Upplýsingar | |
| Fæddur | Krishna Pandit Bhanji 31. desember 1943 Snainton, Yorkshire, Englandi |
| Þjóðerni | Enskur |
| Ár virkur | 1967– |
| Maki | Angela Morant (g. 1966; sk. 1976) Alison Sutcliffe (g. 1978; sk. 1992) Alexandra Christmann (g. 2003; sk. 2005) Daniela Lavender (g. 2007) |
| Börn | 4 |
| Undirskrift |  |
| Helstu hlutverk | |
| |
| Óskarsverðlaun | |
| Besti leikari í aðalhlutverki fyrir Gandhi (1983) | |
Sir Ben Kingsley (fæddur undir nafninu Krishna Pandit Bhanji 31. desember 1943) er enskur leikari. Hann hefur hlotið fjölda verðlauna á sjö áratuga löngum leikferli sínum, meðal annars Óskarsverðlaun, BAFTA-verðlaun, Grammy-verðlaun og tvenn Golden Globe-verðlaun, auk þess sem hann hefur verið tilnefndur til fernra Primetime Emmy-verðlauna og tvennra Laurence Olivier-verðlauna. Kingsley hlaut riddaranafnbót árið 2002 fyrir framlög til breska kvikmyndaiðnaðarins.[1] Hann hlaut stjörnu á frægðargötu Hollywood árið 2010[2] og vann Britanníuverðlaunin árið 2014.[3]
Móðir Kingsley var ensk en faðir hans Indverji frá Gújarat af ættum frá Jamnagar. Kingsley hóf leiklistarferil sinn í leikhúsi. Hann gekk til liðs við Konunglega Shakespeare-félagið árið 1967 og lék aðallega á sviði næstu 15 árin. Hann lék meðal annars aðalhlutverkin í uppsetningum á Hvað sem þið viljið (sem var frumraun hans á West End fyrir félagið í Aldwych-leikhúsinu árið 1967), Ys og þys út af engu, Ríkharður 3. , Ofviðrið, Draumur á Jónsmessunótt, Hamlet og Vindsór-konurnar kátu. Kingsley er einnig þekktur fyrir sjónvarpshlutverk og hefur fjórum sinnum verið tilnefndur til Primetime Emmy-verðlauna, fyrir hlutverk sín í Morðingjar meðal vor (1989), Jósef (1995), Anna Frank (2001) og Frú Harris (2006).
Á hvíta tjaldinu er Kingsley þekktastur fyrir að leika Mahatma Gandhi í kvikmyndinni Gandhi (1982) í leikstjórn Richards Attenborough, sem skilaði honum Óskarsverðlaunum sem besti leikarinn og BAFTA-verðlaunum sem besti aðalleikarinn. Kingsley var tilnefndur til BAFTA-verðlauna sem besti aukaleikarinn fyrir túlkun sína á hlutverki Itzhak Stern í kvikmyndinni Listi Schindlers eftir Steven Spielberg. Hann hefur einnig verið tilnefndur til Óskarsverðlauna fyrir leik sinn í myndunum Bugsy (1990), Sexy Beast (2000) og Hús byggt á sandi (2003). Meðal annarra þekktra mynda með Kingsley má nefna Maurice (1987), Laumuspil (1992), Leitin að Bobby Fischer (1993), Dauðinn og stúlkan (1994), Þrettándakvöld (1996), Tuck að eilífu (2002), Slembi-Slevin (2006), Elegy (2008), Fangaeyjan (2010) og Hugo (2011).
Kingsley hefur leikið persónuna Trevor Slattery í Marvel-kvikmyndaheiminum í rúman áratug, í kvikmyndunum Iron Man 3 (2013) og Shang-Chi and the Legend of the Ten Rings (2021), stuttmyndinni All Hail the King (2014) og þáttaröðinni Wonder Man á Disney+ (frá 2026). Hann hefur jafnframt leikið í stórmyndunum Prinsinn af Persíu: Sandur tímans (2010) og Ender's Game (2013). Kingsley hefur jafnframt ljáð persónum rödd sína í kvikmyndunum Kassatröllin (2014) og Skógarlíf (2016).
Tilvísanir
[breyta | breyta frumkóða]- ↑ „Sir Ben: Knighthood beats Oscar“. BBC News. Sótt 13. mars 2013.
- ↑ „Sir Ben Kingsley gets star on Hollywood Walk of Fame“. BBC News. 28 maí 2010. Sótt 20 júní 2010.
- ↑ „The Britannia Awards: Kathryn Bigelow and Sir Ben Kingsley“. Bafta. 30 júlí 2013. Afrit af upprunalegu geymt þann 7 nóvember 2014. Sótt 26 júní 2015.
